ᓇᐅᔮᑦ ᕼᐊᒻᓚᒋᔭᖓ ᓄᓇᒋᔭᖓᑕ ᒐᕙᒪᖁᑎᒋᔭᖓ. "ᕼᐊᒻᓚᐅᔪᖅ" ᑲᒪᖃᑦᑕᖅᑐᖅ ᐊᐳᑕᐃᔭᐃᓂᕐᒥᒃ, ᐃᒥᖅᑕᖃᑦᑕᕐᓂᕐᒥᒃ, ᐊᓇᖅᑕᖃᑦᑕᕐᓂᕐᒥᒃ, ᐊᒃᑕᑯᓂᒃ, ᐊᒻᒪᓗ ᒪᓕᒐᓂᒃ ᒪᓕᒃᑎᑦᑎᔭᕆᐊᖃᖃᑦᑕᕐᓂᕐᒥᒃ, ᐊᓯᖏᑦᑕᐅᖅ ᐱᓕᕆᐊᕆᕙᒃᑕᖏᑦ ᑕᐃᒪᐅᒋᓪᓗᑎᒃ. ᕼᐊᒻᓚᐅᔪᑦ ᓄᓇᓕᐅᑉ ᑲᑎᒪᔨᒋᔭᖏᑦ, 8-ᖑᓪᓗᑎᒃ ᓄᓇᓕᖕᒥᐅᑕᑦ ᓂᕆᐊᖅᑕᐅᕙᒃᑐᑦ "ᑲᑎᒪᔨᐅᓂᕐᒧᑦ" ᐊᒻᒪᓗ ᓄᓇᓕᐅᔪᖅ ᒪᐃᔭᖃᖃᑦᑕᖅᖢᓂ. ᕼᐊᒻᓚᒋᔭᐅᔪᖅ ᐊᐅᓚᑕᐅᕙᒃᑐᖅ ᑐᑭᒧᐊᒃᑎᑦᑎᔨᒧᑦ, ᐅᔾᔨᖅᑐᖅᑎᐅᕙᒃᖢᓂ ᓄᓇᓕᐅᑉ ᐱᓕᕆᕝᕕᖏᓐᓂᒃ ᓲᕐᓗ: ᐃᒡᓗᓕᕆᔨᒃᑯᓐᓂᒃ ᐋᖅᑭᐅᒪᑎᑦᑎᒍᑎᓂᒃ, ᐃᒪᓕᕆᔨᒃᑯᓐᓂᒃ/ᐊᓇᖅᑕᐅᑎᓕᕆᔨᒃᑯᓐᓂᒃ ᐊᒻᒪᓗ ᐊᒃᑕᑯᓂᒃ, ᓄᓇᒃᑰᕈᑎᓕᕆᔨᕐᔪᐊᓂᒃ ᐊᒻᒪᓗ ᓄᓇᒃᑰᕈᑎᖃᐅᓯᕝᕕᖕᒥ ᐋᖅᑭᐅᒪᑎᑦᑎᔨᓂᒃ, ᓄᓇᓕᖕᒥ ᐱᕙᓪᓕᐊᔪᓕᕆᔨᒃᑯᓐᓂᒃ, ᓄᓇᓕᐅᑉ ᐱᙳᐊᖅᑐᓕᕆᔨᒃᑯᖏᓐᓂᒃ, ᒪᓕᒐᓂᒃ ᒪᓕᒃᑎᑦᑎᔨᓂᒃ, ᕼᐊᒻᓚᐅᔪᑦ ᐱᓕᕆᕝᕕᖏᓐᓂᒃ ᐱᔪᓐᓇᐅᑎᑖᖅᑎᑦᑎᔨᓂᒃ ᐊᒻᒪᓗ ᐊᔾᔨᒋᙱᑦᑑᑕᐅᔪᓂᒃ ᓄᓇᓕᖕᒥ ᐱᔨᑦᓯᕋᐅᑎᓂᒃ. ᕼᐊᒻᓚᒃᑯᑦ ᐊᐅᓚᑦᑎᕙᒃᑐᑦ ᓄᓇᓕᖕᒥ ᐊᒻᒪᓗ ᐊᒥᓱᓂᒃ ᓴᓇᑎᑦᑎᕙᒃᖢᑎᒃ ᓄᓇᓕᐅᑉ ᐃᓗᐊᓂ.
ᕼᐊᒻᓚᐅᔪᑦ ᓄᓇᕗᒥ ᐃᓗᐃᑦᑐᒃᑯᑦ ᑮᓇᐅᔭᖅᑖᖅᑎᑕᐅᓯᒪᕙᒃᑐᑦ ᓄᓇᕗᑦ ᒐᕙᒪᒃᑯᖏᓐᓄᑦ, ᑮᓇᐅᔭᖅᑖᖅᑎᑦᑎᓂᐅᕙᒃᑐᒃᑯᑦ ᐃᓄᒋᐊᖕᓂᖏᑦ ᒪᓕᒃᖢᒋᑦ, ᐱᔭᐅᔭᕆᐊᓖᓪᓗ ᐊᒻᒪᓗ ᐊᓯᖏᑦ ᐊᔾᔨᒌᙱᑦᑑᑕᐅᔪᑦ, ᐊᒻᒪᓗ ᕼᐊᒻᓚᐅᔪᖅ ᐱᓕᕆᐊᒃᓴᓕᒃ ᓄᓇᓕᖕᒥ ᐱᔨᑦᓯᕋᕆᐊᖃᕐᓂᕐᒧᑦ. ᕼᐊᒻᓚᒃᑯᑦ ᐱᒻᒪᕆᐊᓗᒃᑯᑦ ᐱᓕᕆᐊᒃᓴᖃᖅᐸᒃᑐᑦ ᓇᐅᔮᓂ, ᑕᐃᒪᐃᒻᒪᑕ ᑕᒪᐃᓐᓂᒃ ᓄᓇᓕᖕᓂ ᓄᓇᕗᒥ. ᒐᕙᒪᑐᖃᒃᑯᑦ ᑐᓂᐅᖅᑲᐃᕙᒃᑐᑦ ᑮᓇᐅᔭᖅᑖᖅᑎᑦᑎᔾᔪᑎᖏᓐᓂᒃ ᓄᓇᕗᑦ ᒐᕙᒪᒃᑯᖏᓐᓄᑦ ᐃᖃᓗᖕᓂ, ᑖᑉᑯᐊᓗ ᑐᓂᓯᓕᖅᐸᒃᖢᑎᒃ %-ᑎᖏᑦᑎᒍᑦ ᓄᓇᓕᖕᓄᑦ ᕼᐊᒻᓚᐅᔪᑦ ᐱᔨᑦᓯᕋᕈᓐᓇᖁᑉᓗᒋᑦ. ᓂᕈᐊᖅᑕᐅᓯᒪᔪᑦ ᕼᐊᒻᓚᒃᑯᑦ ᑲᑎᒪᔨᖏᑦ ᐃᓱᒪᓕᐅᖅᐸᒃᑐᑦ ᓄᓇᓖᑦ ᐱᔭᕆᐊᖃᖅᑕᖏᓐᓂᒃ ᐊᒻᒪᓗ ᕼᐊᒻᓚᒃᑯᑦ ᑐᑭᒧᐊᒃᑎᑦᑎᔨᖓ ᓴᓇᔨᖏᓪᓗ ᐊᐅᓚᑦᑎᓕᖅᐸᒃᑐᑦ ᐱᔭᐅᔭᕆᐊᓖᑦ ᒪᓕᒃᖢᒋᑦ.
ᓇᐅᔮᑦ ᕼᐊᒻᓚᖓ
ᑎᑎᖅᑲᖅᑖᕐᕕᒃ 10 ᓇᐅᔮᑦ, ᓄᓇᕗᑦ X0C 0H0
ᐅᖃᓘᑖ: 867-462-9952 ᓱᒃᑲᔪᒃᑯᑦ: 867-462-4411